Mesditën e sotme, mbërritën në aeroportin e Rinasit, 208 mijë doza të vaksinës anti-covid të kompanisë Sinovac.
Në pistën e Rinasit, vaksinat janë pritur nga dy ministrat Arben Ahmetaj dhe Ogerta Manastirliu, të cilët kanë bërë me dije se ngarkesa e fundit përmbyll edhe lëvrimin e kontratës me distributorin turk të vaksinës.
“208,000 vaksina sapo kanë mbërritur në Rinas, pjesë me distributorin e Sinovac. Kemi përfunduar lëvrimin e kontratës. Kemi siguruar 500 mijë doza vaksine. Sot në Shqipëri nga momenti i parë i fillimit të lëvrimit, kemi më shumë se 700 mijë vaksina që kanë mbërritur në Shqipëri. Sot përsëri pritet që të kemi doza nga Pfizer. Pritet që të vijnë 8190 doza që mbërrijnë mbrëmjen e sotme,”-tha Manastirliu.
Që prej fillimit të vaksinimit janë kryer në total 333,330 doza të vaksinës ndaj COVID19, prej të cilëve 251,726 vaksinime për persona mbi 60 vjeç.
Procesi i vaksinimit po kryhet sipas të gjithë parametrave të sigurisë dhe cilësisë nga ekipe të trajnuar vaksinatorësh në të gjithë vendin.
