Shqipëria do të përfitojë edhe 50 mijë doza të vaksinës anti-covid të prodhuar nga kompania AstraZeneca. Lajmin e ka bërë të ditur kryeministri Edi Rama, përmes një postimi në rrjetet sociale.
”LAJM I MIRË. Sapo kemi siguruar 50 mijë vaksina të tjera Astrazeneca jashtë marrëveshjeve të deritanishme’’, shkruan Rama në rrjetin social, Facebook.
Disa ditë më parë, në Shqipëri mbërritën nga Turqia 192 mijë vaksina kineze anti-covid të prodhuar nga kompania Sinovac.
Prej 4 ditësh, në vend ka filluar vaksinimi masiv i popullsisë, teksa deri më tani kanë marrë dozat rreth 120 mijë qytetarë.
Ndërkohë, më herët gjatë ditës së sotme, Ministrja e Shëndetësisë, Ogerta Manastirliu bëri me dije se gjatë muajit prill do të vijnë 20 mijë doza të vaksinës Pfizer, duke shtuar se vendi është i përgatitur për të rritur numrin e vaksinave.
