Kryetarja e LSI, Monika Kryemadhi deklaroi se Partia Demokratike dhe forca politike që ajo drejton, do të dalin me dy lista në zgjedhjet parlamentare të 25 prillit.
E ftuar në emisionin ”Open”, Kryemadhi u shpreh se opozita mund të ketë disa koalicione me dy të panjohura, që do të përdoret për të maksimalizuar votën.
Kryemadhi tha se LSI zgjodhi që të dalë në një listë të vetme për të marrë dhe votat e socialistëve të zhgënjyer.
Monika Kryemadhi: ”Të sinqertë, jam në kontakt me Bashën, i gjithë ekipi, janë në kontakt me njeri-tjetrin, duhet të shohim stilistikën e koalicioneve, por ka një koalicion, që është opozita e bashkuar. Është 1 listë, 2 apo 3 janë kalkulime matematikore që maksimalizojnë të gjitha votat. Ne do të dalim me listën tonë, ndërkohë që PD do të ketë listën e saj, por mund të kemi disa koalicione me dy të panjohura, që do të përdoret për të maksimalizuar votën. Në disa qarqe po mendojmë të garojmë bashkë për të shmangur konkurencën mes nesh dhe për të maksimalizuar votën.”
Eni Vasili: ”Sipas sondazheve të deritanishme vërehet se në këtë mënyrë me lista të ndara nuk ka maksimalizim votash.”
Monika Kryemadhi: ”Nuk është e vërtetë. Hyrja në një listë PD-LSI bën që socialistët e zhgënyer të rrinë në shtëpi. Ndërsa ndarja jonë bëjnë që socialistët e zhgënjyer të dalin të votojnë. Ne parti e majtë jemi, nuk jemi e djathtë. Ato vota synojmë.”
