Kryetarja e Bashkisë Dimal (ish Ura Vajgurore), Juliana Mema, akuzohet për ‘shpërdorim detyre’. Një kallëzim penal është regjistruar ndaj saj, në Prokurorinë e Rrethit Gjyqësor të Beratit. Kryebashkiakja Mema është akuzuar nga Petrit Baho, banor në fshatin Poshnje për ‘shpërdorim detyre’, ‘shkatërrim i pronës private’, ‘mashtrim’ dhe ‘falsifikim të dokumentave’. Por Prokuroria e Rrethit Berat ka shpallur moskompetencën lidhur me rastin, duke e përcjellë kallëzimin penal për Memën në Prokurorinë e Posaçme në Tiranë, SPAK.
Në kallëzim thuhet se: Shtetasi Petrit Baho, i datëlindjes 24.01.1960, lindur dhe banues në fshatin Poshnje, është pronar i pasurisë së paluajtshme me nr.455/12,e llojit “truall dhe godinë 2 KT”,me sipërfaqe 97.6 m2 dhe prona është e regjistruar në zonën kadastrale 3032 në Poshnje.
Për këtë pronë, Petrit Baho është i pajisur edhe me certifikatë pronësie. Në 25 nëntor 2020, me një njoftim të firmosur nga kryebashkiakja Juliana Memaj për lirimin e hapësirave publike, pranë banesës së tij janë paraqitur disa persona si punonjës të bashkisë dhe pa asnjë dokumentacion ligjor kanë filluar të prishin disa prona aty pranë dhe më pas kanë filluar të prishin edhe objektin me dokumentacion të rrregullt të shtetasit Petrit Baho.
Pasi është njoftuar policia, e cila nuk ka ndërhyrë, shtetasi Petrit Baho i është drejtuar Gjykatës së Rrethit Gjyqësor Berat për marrjes e masës së sigurimit të padisë. Pak ditë më vonë, mbi pronën e tij ka filluar punimet (që po vijojnë ende) qytetari Ramadan Baho, që pretendon se ka marrë leje nga bashkia”.
Lidhur me këtë çështje, një reagim ka ardhur nga kryetarja e Bashkisë Dimal, Juliana Mema, e cila thotë se akuzat nuk janë të vërteta, por janë shpifje.
“Akuzat nuk janë të vërteta, shpifje. Ka Zot që i gjykon, unë jam në rregull. Jam një njohëse e mirë e ligjit”, ka deklaruar ajo për “Fax News”.
