Mjeku shqiptar në Londër, Sali Urovi, në një intervistë për ABC, teksa foli për variantin e ri të virusit tha se për ekspertët ishte e pritshme që virusi të pësonte ndryshime. Madje ai sqaroi se që nga zbulimi, Covid-19 ka pësuar 4 mijë mutacione, tetë prej tyre po monitorohen, ndërsa dy janë parë të arsyeshme të bëhen publikë.
Mjeku sqaroi për publikun se virusi i gripit është një virus që pëson çdo vit mutacion. Ndaj edhe Covid-19 s’është i përjashtuar nga kjo gjë. Madje ekspertët e fushës kanë qënë të vetëdijshëm se do të ndodhte një gjë e tillë.
“Virusi i gripit është një virus që pëson çdo vit mutacion. Kjo është arsyeja që çdo vit i gjithë globi infektohet me grip.
Edhe Covid nuk është i përjashtuar nga ky fenomen. Ne e dinim që në fillim që do të ndodhte. Janë zbuluar 4 mijë ndryshime që nga fillimi deri tani.
Janë zbuluar dhe po monitorizohen vetëm 8 mutacione dhe vetëm dy e kanë parë të arsyeshme të japin informacion publik”, u shpreh ai.
I pyetur nëse është e efektshme vaksina edhe për këtë variant të ri, mjeku tha se nuk mund të flitet për një siguri 100 përqind, por ekspertët besojnë se do të ketë efekt.
“Të dhëna 100% të sakta nuk mund të kemi, sepse vaksina sapo ka filluar të shpërndahet. Komiteti Shkencor është i besimit se vaksina do të ketë efekt, pavarësisht këtij mutacioni. Ajo që ka ndryshuar në këtë virus është aftësia për të infektuar sa më shumë njerëz”, tha ai.
