Gjatë ditëve të fundit, është vënë re një ulje e numrit të të infektuarve në Shqipëri. Në 24 orët e fundit, Ministria e Shëndetësisë informoi se 461 persona rezultuan pozitivë.
Rezultatet e të infektuarve vijnë nga kryerja e 1.927 testimeve, duke përfshirë këtu edhe testet e shpejta. Duke parë këtë ecuri, shpresa rritet për përmirësim të situatës.
Por shefi i Laboratorit të Mikrobiologjisë në QSUT, Andi Koraqi, u shpreh në ‘Euronews Albania’ se do të ketë ndryshim të masave anti-COVID gjatë festave të fundvitit. Ai tha se duke iu referuar indikatorëve, do të ketë ndryshime.
“Duke parë indikatorët, besoj se do të kemi ndryshime. Megjithatë është për t’u diskutuar në mbledhjen e radhës”, u shpreh mjeku.
Koraqi theksoi se duhet parë në vijimësi nëse kjo rënie është e qëndrueshme, apo jo. “Ka disa ditë që duket sikur ka rënë numri i të infektuarve, në fakt kjo duhet të zgjasë dhe duhet shikuar edhe javës tjetër nëse është reale, apo është rastësi që numri i të infektuarve ka rënë.
Ndoshta vjen si pasojë e afrimit të festave. Duhet parë në vazhdimësi nëse kjo rënie është e qëndrueshme, apo jo. Pashë dje që numri i të shtruarve në spitale kishte rënë me rreth 20%. Nëse kjo është e qëndrueshme, kemi realisht një numër më të vogël të të infektuarve, kjo duhet parë në javët në vazhdim”, tha ai.
