Gjykata e Tiranës caktoi dje masën e sigurisë “Arrest shtëpie” për Denisa Dokun, 19-vjeç, e akuzuar për veprën penale “Shkelja e rregullave të qarkullimit rrugor”. E reja drejtonte makinën tip “Smart”, kur ndodhi aksidenti tragjik më datë 5 dhjetor, në rrugën “Demokracia” në Kamzë. Në këtë aksident humbi jetën 22 vjeçarja pasagjere, Alida Spahiu.
Masa “arrest shtëpie” i është dhënë me kushtin e heqjes së patentës, deri në përfundim të hetimit gjyqësor. Prindërit e vajzës që ka ndërruar jetë, deklaruan në gjykatë se nuk duan që Denisa të ndiqet penalisht. 19-vjeçarja e cila ndodhet në spital pasi mori plagë nga aksidenti, sipas dëshmisë së familjarëve është kunata e Alida Spahiut. Prindërit e të ndjerës deklaruan në gjykatë se nuk duan që Denisa të ndiqet penalisht, pasi janë sqaruar me të, dhe nuk mendojnë se e reja ka pasur faj në aksident. “Marrëdhëniet tona me familjen Doku janë të sqaruara. Kemi marrëdhënie familjare, pasi Alida ishte e fejuara e vëllait të Denisës”, thonë familjarët.
Makina tip “Smart” që drejtohej nga Denisa Doku, është përplasur me dy mjete të tjera. Pas aksidentit tragjik, dy të plagosurat u transportuan për në spital, por 22-vjeçarja nuk ka mundur t’ia dalë si pasojë e plagëve të rënda që kishte marrë.
Sipas organit të akuzës, ka qenë makina tip “Smart” ajo që është bërë shkak për aksidentin me pasojë vdekjen e një 22-vjeçareje.
View this post on Instagram
