25-vjeçari Klodjan Rasha, u qëllua nga një polic pak pas mesnate, pasi nuk i është bindur urdhrit të këtij të fundit për të ndaluar. Ngjarja ka ndodhur rreth orës 01:45, në një nga rrugicat, në afërsi të Laprakës në Tiranë, teksa i riu ka qenë duke lëvizur në këmbë.
Klodjan Rasha mbeti i plagosur dhe më pas ndërroi jetë në spital. Në lidhje me këtë ngjarje, efektivi i policisë që qëlloi ndaj 25-vjeçarit në Tiranë, ka rrëfyer se e qëlloi pasi iu duk sikur e kërcënoi me armë. Ai ka thënë në rajonin e policisë se ka qënë turni i tretë në punë. Ka nisur patrullimin në zonë për të parë zbatimin e ligjit, dhe të masave të vendosura nga Komiteti Teknik. Gjatë orarit të punës, ka konstatuar një djalë të ri, që ishte larguar në mënyrë të dyshimtë.
“Isha turni i tretë në punë. Pas instruktazhit në komisariat, kam nisur patrullimin në zonë për të parë zbatimin e ligjit dhe të masave të vendosura nga Komiteti Teknik. Kam konstatuar në unaze një djalë të ri që sapo na pa, u largua me vrap në mënyre të dyshimtë.
Kam njoftuar sallën, dhe i jam vënë në ndjekje ku herë pas here i kam bëre thirrje të ndalojë. I kërkova ta ndalojë për ta pyetur për arsyen e daljes, por ai nuk u bind. Here pas here kthehej dhe m’u duk sikur më kërcënoi me armë dhe veprova”, tha polici.
Policia njoftoi se ka gjetur edhe armën e zjarrit, një pistoletë që dyshohet se i përkiste 25-vjeçarit. Por familjarët e tij mohojnë që Klodjan Rasha të ketë patur armë zjarri me vete.
