Sikundër Gjermania, edhe Greqia ka marrë vendimin për shtyrjen e masave kufizuese, për shkak të shifrave të papërballueshme për sistemin shëndetësor. Gjatë ditëve të fundit është raportuar për një situatë kaotike në Greqi, lidhur me infektimet.
Pavarësisht izolimit, numri i pacientëve të infektuar është sërish në shifra të larta. Vendimi më i fundit i marrë nga ana e qeverisë greke, lidhet me zgjatjen e masave kufizuese deri më datën 7 dhjetor.
Zëdhënësi i qeverisë greke, Stelios Petsas, ka njoftuar qytetarët se kanë qenë të detyruar të marrin këtë vendim, për shkak të fluksit të të infektuarve. Sa i takon vendimit për hapjen e vendit, sipas tij, do të vendoset duke marrë parasysh situatën e për të ‘shpëtuar’ Krishtlindjet.
“Lockdown-i total do të shtyhet, duke iu referuar të dhënave epidemiologjike, duke mos dhënë garanci edhe për ‘shpëtimin’ e Krishtlindjeve dhe Vitit të Ri. Në mënyrë që kur të heqim masat të jemi të sigurtë. Ne duhet t’u përmbahemi masave, të kufizojmë lëvizjet”, ka thënë zëdhënësi i qeverisë.
