Aktorja Inida Kreuz, e njohur ndryshe me emrin e artit si Zhaku, ka rrëfyer si rrallë herë si erdhi ndarja pas 7 vitesh martesë me bashkëshortin e saj gjerman, Kristian. E ftuar në emisionin “Ftesë në 5”, Zhaku tha se marrëdhënia mes tyre ishte bërë shumë toksike, ndaj erdhi dhe ndarja.
Ajo zbuloi se po kalonte në gjendje depresive, dhe se nuk po ndihej e realizuar nga ana artistike. Ndaj ndarja duket se i ka bërë mirë, për të gjetur ekuilibrin.
“U bë paksa toksike marrëdhënia. Më e bukura është ama që ashtu më dukej mua atëherë. Të dyve na dukej ashtu, sepse ishte një lloj konsensusi që e arritëm bashkë. Por kur je bashkë edhe zihesh, filloi të ketë një lloj krisje.
Për të mos shkatërruar nervat, edhe unë po kaloja një gjendje depresive, nuk po ndihesha e realizuar nga ana artistike, kisha hequr dorë nga shfaqjet në teatër. Kur nuk të sjell rezultate, është e gjithë ajo punë.
Ajo ndarja na bëri shumë mirë, për të kuptuar dhe për të gjetur ekuilibrin, për të studiuar veten. Kisha nevojë për të parë se ku arrija unë vetë. Kisha nevojë të shikoja veten time pa Kristianin”, tha Zhaku.
