Një vit më parë, aktori i njohur Leonardo Di Caprio iu bashkua fushatës dhe apelit për mbrojtjen e lumit Vjosa në Shqipëri, duke postuar në faqen e tij në Instagram një shkrim të Associated Press. Në tetor të vitit 2019, fituesi i çmimit Oscar shprehej kundër vendimit për të ndërtuar hidrocentrale në Vjosë, që është edhe një nga lumenjtë e ‘egër’ në Evropë.
Di Caprio ka shpërndarë videon dhe tekstin e Associated Press në profilin e tij në Instagram ku flitet për veçantinë e lumit shqiptar. Por ai nuk e ka lënë me kaq. Aktori mjaft i dashur për publikun shqiptar, ka reaguar sërish dhe ka postuar një foto të lumit Vjosa në profilin e tij në rrjetin social.
Fotoja me mesazhin “Vjosa, jo diga” shoqërohet më një shkrim të gjatë. Sipas aktorit, lajme të mira vijnë nga Shqipëria për mbrojtjen e Vjosës.
View this post on Instagram
Në një postim në rrjetet sociale, ai ka përcjellë deklaratën e bërë nga kryeministri Edi Rama për refuzimin e projektit të Kalivaçit, dhe vendimin që zona të jetë park kombëtar.
“Lajme shumë premtuese vijnë nga Shqipëria. Vjosa, një nga lumenjtë e fundit të egër të Evropës mund të shpëtohet nga zhvillimi i hidrocentraleve. Më 25 Shtator, Kryeministri i Shqipërisë Edi Rama njoftoi se projekti i Kalivaçit u refuzua, dhe se zona do të bëhet park kombëtar.
Parku Kombëtar i Lumit Vjosa do të ishte vendi më i madh në Evropë, për ruajtjen e lumenjve, duke mbuluar qindra kilometra lumenj dhe përrenj, e duke mbrojtur njëkohësisht qindra mijëra specie në rrezik.
Kjo do të ishte një arritje e madhe për Shqipërinë, dhe pjesën tjetër të Evropës dhe parku mund të kthehet në model për Strategjinë e Biodiversitetit brenda kornizës së Marrëveshjes së Gjelbër”, shkruan ndër të tjera aktori amerikan.
Lumi Vjosë konsiderohet si një nga lumenjtë e fundit të Evropës që nuk është shfrytëzuar për nxjerrjen e burimeve energjetike, dhe ndërtimi i hidrocentraleve në të do të prishte florën dhe faunën e zonës. Në shtator, Rama paralajmëroi refuzimin e lejeve mjedisore të HEC-eve në lumin Vjosë, duke thënë se qeveria shpalli Park Kombëtar pjesën e Vjosës së Sipërme.
