Besart Kadia është emëruar disa ditë më parë zv.ministër i Financave dhe Ekonomisë në qeverinë Rama. Deputeti Myslim Murrizi, shprehet se i gjithë ky teatër prej 30 vitesh e ka zanafillën tek filli bolshevik. Ai tha shkurt dhe qartë se partitë politike shqiptare, nuk janë demokratike.
“136 parti politike të regjistruara në Gjykatën e Tiranës, janë treguesi më i mirë se çfarë bolshevizmi mbartin forcat politike. PD ka tri ditë që është ngritur në këmbë për Islamin, para 6 javësh shpalli armik Rusmajlin. Ju punësuat Besart Kadinë, ata nxorën letrën dhe thanë e kemi shpallur armik.
I gjithë ky teatër prej 30 vitesh e ka zanafillën tek filli bolshevik, sepse prej 30 vitesh janë drejtues nga komunistë. Partitë politike shqiptare nuk janë demokratike. Këta gjithë ditën zihen, gjithë natën bëjnë atë që s’thuhet. Kështu më tha një i moshuar, dhe kjo është e vërteta. Do ishte mirë të kishin kurajo, që të bëhej ligj real politik për partitë politike shqiptare”, tha Murrizi nga Kuvendi.
Kujtojmë këtu se me një shkresë që u publikua me urgjencë në media, PD teksa e akuzonte Kadinë si “agjent” të Ramës, pohonte se e kishte shkarkuar Kadinë që një vit më parë, kur krijoi lëvizjen “Alternativa”. Në “Zonë e Lirë”, Besart Kadia e quajti jo profesional qëndrimin e PD-së, ndërsa shtoi se miminalisht duhej të ishte njoftuar.
Sipas një dokumenti, PD ka shkarkuar ish anëtarin e Këshillit Kombëtar të kësaj partie, Besart Kadia, më shumë se një vit më parë. Arsyeja e shkarkimit të tij është pasi Kadia ka qenë nismëtar i një lëvizje politike “Alternativa”, që sipas PD-së, ka qenë financuar nga mazhoranca.
Partia e krijuar si një alternativë e djathtë, mbylli shpejt veprimtarinë. Që nga data 5 nëntor 2019, Kadia nuk ka asnjë funksion në PD dhe sipas vendimit, nuk mund të ketë as në të ardhmen.
“Në mbështetje të nenit 9, 13, 27, 49 dhe 53 të statutit të Partisë Demokratike të Shqipërisë, Kryesia e PDSh-së, në mbledhjen e datës 05.11.2019. Pasi u njoh me faktin se z. Besart Kadia, anëtar i Këshillit Kombëtar të PDSH-së, është nismëtar i krijimit të lëvizjes politike “Alternativa” e financuar sipas informacioneve të verifikuara nga burime të dyshimta financiare të klientëve preferencial të Qeverisë”, shkruhet në dokumentin e PD-së.
