Nga: Melinda Haring “National Interest”
Donald Trump do të hyjë në histori si presidenti më i keq i Shteteve të Bashkuara. Si një republikane e përjetshme dhe një mbështetëse e lëvizjes “Never Trump”, unë nuk e duroja dot atë njeri. E megjithatë, sot e them se do të më marrë malli për të. Ja cilat janë 5 arsyet pse edhe botës mund t’i mungojë Donald Trump.
Së pari, ndërsa Filip Rot vuri në dukje se Trump “zotëron një fjalor prej vetëm 77 fjalësh”, e vërteta është se presidenti në ikje kishte një fjalor të jashtëzakonshëm. Ai mund të mos ketë qenë shumë koherent me gjërat që bënte, por ishte gjithmonë i vlerësueshëm.
Sulmet e Trump ndaj gramatikës dhe sintaksës, zakonisht të bëra me shpërthimet e tij prej vetëm 280 shkronjash në rrjetet sociale, ishin të dhimbshme për puritanët, por të paharrueshme për të gjithë të tjerët. Ata i dhanë një jetë të re secilit prej nesh që merret me fjalën. Nuk do të vonojë shumë dhe gazetarët dhe analistët, do ta dëshirojnë rikthimin e spektaklit të tij ekstravagant.
Së dyti, gjatë presidencës së tij kishte drama. A u pushua nga puna Sekretari i Shtetit? A do të sulmojë presidenti Korenë e Veriut? A e dëgjuat atë që sapo bëri Trump? Sot thojini lamtumirë të gjithë kësaj. Mijëra njerëz dolën në rrugët e Uashingtonit të shtunën në mbrëmje duke kërcyer dhe duke tundur flamuj amerikanë,si të ishin duke festuar gjatë një parade të 4 Korrikut në një qytet të vogël. Nuk pati dhunë. Zhurma më e madhe në shesh vine nga një zile dhe nga vajza ime 5-vjeçare që brohoriste “USA, USA!”.
Së treti, Trump shpërfilli diplomacinë tradicionale. Trump dërgoi raketat “Javelin” në Ukrainë, diçka që paraardhësi i tij refuzoi të bënte. Obama pretendonte se armatosja e ukrainasve do të zemëronte “ariun” rus, duke i zhytur Shtetet e Bashkuara në një luftë tjetër.
Ai e kishte gabim. Fillestari në politikën e jashtme, Donald Trump, bëri lëvizjen e duhur, duke i dhënë Ukrainës siguri më të madhe, dhe garanci për mbështetjen nga ana e SHBA-së. Kur Trump urdhëroi vrasjen e gjeneralit iranian Kasëm Sulejmani, ekspertët parashikuan katastrofën. Por kjo gjë nuk ndodhi. Trump bindi Bahreinin, Sudanin dhe Emiratet e Bashkuara Arabe, të njohin shtetin e Izraelit. Dhe këto janë arritje reale.
Sigurisht, ai ishte me fat në disa raste. Por politika e tij e jashtme, e rriktheu aftësinë e Shteteve të Bashkuara për të projektuar fuqinë e vet për dekada. Nga ana tjetër, lejimi i Arabisë Saudite që të vriste brutalisht një gazetar të njohur saudit në konsullatën e saj në Stamboll, duke përkrahur kështu autokratët në Riad, dhe vendosja e Majkëll Pak në kontrollin e transmetimeve ndërkombëtare të SHBA ishin gabime epike. Gjithsesi, sukseset e tij të dukshme na kujtojnë se ndonjëherë gjërat mund të bëhen duke injoruar studimet e Këshillit për Marrëdhëniet e Jashtme.
Së katërti, nuk ka pasur kurrë një drejtor komunikimi të Shtëpisë së Bardhë si ai më parë, dhe nuk do të ketë më kurrë. Analistët e think-tankeve, dhe askush nga republikanët nuk e kishin idenë se cilat ishin mundësi që krijoheshin kur një yll i televizionit u zgjodh president në vitin 2016, pa pasur asnjë ekip të vërtetë profesionistësh me vete. Kjo gjë nuk ka për të ndodhur më.
Së fundmi, indiferenca dhe paaftësia e Trump, i dha mundësi të shkëlqenin profesionistët e karrierës dhe Kongresit. Kur presidenti u përpoq të zeronte programet e rëndësishme të shkëmbimit që sjellin të huaj në Shtetet e Bashkuara, Kongresi ia refuzoi projektin.
Kur presidenti u përpoq të zvogëlojë dy të tretat e buxhetit për Nismën Kombëtare të Demokracisë, ndodhi e njëjta gjë.
Dhe kur Trump u përpoq të shantazhonte presidentin e Ukrainës për të hapur një hetim të motivuar politikisht, ishin nëpunësit civilë parimorë, zyrtarët e shërbimit të huaj diplomatik dhe pjesëtarët e ushtrisë që e demaskuan në publik. “Mbreti i çmendur” bëri më të keqen, por më e mira jonë, bëri më të mirën.
Burimi i lajmit: https://nationalinterest.org/feature/5-reasons-why-world-will-miss-donald-trump-172559
Përshtatur nga TIRANA TODAY
