Eksperti i Shëndetit Publik, Erion Dasho, ka reaguar në Facebook në lidhje me spitalin e tretë COVID që pritet të hapet sot. Ai ngre disa pyetje, të cilat presin edhe përgjigje.
Në spitalin COVID 3 do të transferohen pacientët që në dy spitalet aktuale, janë në gjendje të stabilizuar.
Në morinë e pyetjeve, ai kërkon të dije se kush do të mbajë përgjegjësinë përpara familjarëve dhe ligjit, nëse pacienti i transferuar humb jetën.
Dhe në fund e mbyll me një tjetër pyetje; nëse e gjithë kjo procedurë është një tjetër eksperiment i rrezikshëm për shëndetin dhe jetën e shqiptarëve.
Statusi
A mund të punojë prapsht sistemi i referimit të pacientit në rastin e COVID-19?!
A mund që një pacient “i stabilizuar” të transferohet nga një strukturë që ofron një nivel më të lartë shërbimi drejt një strukture që ofron nivel më të ulët pa u deklaruar “i shëruar” ose të paktën “i përmirësuar” për arsyen e shtrimit në spital?!
Në kushtet e një sëmundjeje që nuk njihet ende plotësisht dhe është dalluar deri tani për vështirësinë e parashikimit të ecurisë klinike?!
Kush do të mbajë përgjegjësinë përpara familjarëve dhe ligjit në se pacienti i transferuar vdes?! Po në se “destabilizohet” sërish?! Apo ping-pong drejt COVID-1 dhe 2?!
A mos është i gjithë ky një tjetër eksperiment i rrezikshëm për shëndetin dhe jetën e shqiptarëve?!
