Kryeministri Rama ka nënshkruar një memorandum bashkëpunimi ekonomik me Nënsekretarin e SHBA për Zhvillimin Ekonomik, Energjinë dhe Mjedisin, Keith Krach, teksa ky i fundit ndodhet në një vizitë në Shqipëri.
Në konferencën për media me zyrtarin e lartë amerikan, Rama tha se memorandumi i nënshkruar sot do të ndikojë ndjeshëm në hapjen e një kapitulli të ri, për investimet e drejtpërdrejta jo vetëm amerikane, por edhe të vendeve të tjera të huaja në Shqipëri.
Po kështu, kreu i qeverisë i ka përcjellë presidentit Donald Trump, shërim sa më të shpejtë nga Covid-19, si dhe i ka shprehur falenderimin për vëmendjen dhe besnikërinë me të cilën SHBA e ka shoqëruar Shqipërinë ndër këto vite.
“SHBA, kontribut të çmuar në vendin tonë. I jemi mirënjohës për mbështetjen e palëkundur që i kanë dhënë Shqipërisë që në ditën e para nga dalja e errësirës së komunizmit, në rrugën e reformave dhe të përpjekjeve për të formuar një shtet demokratik dhe për të konsoliduar shtetin e së drejtës.
Ne i jemi mirënjohës SHBA edhe për kontributin e tyre të paçmueshëm në rajonin tonë. Falë SHBA sot jemi në një realitet tërësisht të ndryshëm nga ai i jo shumë viteve më parë. Sot flasim për bashkëpunim dhe për paqe të qëndrueshme të gjithë rreth një tryeze.
Dua ta falenderoj me gjithë zemër nënsekretarin për ardhjen e tij këtu personalisht, për të kurorëzuar një proces të përgatitur falë përfshirjes së drejtpërdrejtë të ambasadores, duke nënshkruar një marrëveshje e cila fillon konkretizimin e pikave kyçe të dokumentit strategjik.
Përmes nënsekretarit unë dëshiroj që publikisht ti përcjell Trump-it urimin më të sinqertë për një shërim sa më të shpejtë, dhe të shpreh falenderimin për të dhe për administratën e tij për vëmendjen dhe besnikërinë me të cilën SHBA e kanë shoqëruar Shqipërinë në këto vite. Dhe padyshim për një pikë kyçe në historinë e këtij rajoni që ishte nënshkrimi i marrëveshjes mes Serbisë dhe Kosovës në Shtëpinë e Bardhë, jo si një proces i nisur më parë për bashkëpunim dhe normalizim të marrëdhënieve, edhe për shtysën e fortë që i dha mirënjohje të paimagjinueshme deri përpara atij takimi. Faktikisht do të ndikojë ndjeshëm në hapjen e një kapitulli të ri për investimet”, tha Rama.
