Gjykata e Lartë ka regjistruar rekursin e ish-ministrit të Brendshëm, Saimir Tahiri, i cili ka kundërshtuar vendimin e Apelit të Posaçëm në 26 qershor, për të kthyer dosjen në ngarkim të tij për rigjykim në Shkallën e Parë. Relator i këtij procesi në Gjykatën e Lartë, do të jetë gjyqtari Ilir Panda.
Ish-ministri Tahiri dhe ish-drejtori i Policisë së Vlorës, i kërkojnë Gjykatës së Lartë të prishë vendimin e Apelit, dhe të pushojë çështjen ndaj tyre.
Ish-ministri i Brendshëm Saimir Tahiri, u vu nën akuzë pas arrestimit të grupit “Habilaj” ndërsa që në fillim ai pretendoi pafajësi, duke e quajtur një proces farsë me prova të montuara.
Në shtator të vitit të kaluar, ish-Prokuroria e Krimeve kërkoi dënimin e tij me 12 vite, ndërsa për shkak të gjykimit të shkurtuar shkonte 8 vite, por gjykata e dënoi Tahirin me 3 vite burg me shërbim prove.
