Konstitucionalisti, Shkëlqim Hajdari ka komentuar situatën aktuale politike në vend dhe mbledhjen e zhvilluar nga Komisioni i Ligjeve.
Në një intervistë për News24, Hajdari tha se në fund të mbledhjes u ra dakord që të të diskutohen të gjitha draftet dhe të integrohen ndryshimet mes tyre.
Më tej, Hajdari u shpreh se kjo që po bëhet nga palët politike nuk është ndonjë reformë e madhe, duke e cilësuar reformën zgjedhore si minimale.
“Në përfundim të diskutimeve të sotme u ra dakord që të treja draftet, qoftë ai i mazhorancës, qoftë ai i propozuar nga Murrizi dhe drafti i propozuar nga Patozi të diskutohen. Pra u ndërpre mbledhja dhe u ra dakord që të diskutohen dhe të gjithë ndryshimet të integrohen tek njëri-tjetri, për ato që bihet dakord dhe për ato që jo. Domethënë, nesër do të vazhdojë diskutimi.
Sot u ra dakord që të shkrihen të gjithë draftet e propozuara. Unë shpresoj që do të bëjnë pjesë të diskutimeve edhe draftin që ka dërguar Partia Demokratike. Edhe nesër do të merren nen për nen në mënyrë që nëpërmjet asaj që të shkohet në Parlament, të shkohet me një draft. Shpresoj që të paktën mazhoranca me opozitën parlamentare, por edhe me PD-në të bien dakord.
Me thënë të drejtën, këta nuk po bëjnë ndonjë reformë të madhe. Kjo është një reformë minimale demokratike. Sa i përket pragut, sigurisht që do të bien dakord. Nuk është ndonjë gjë e madhe, se është pa sens. Ndërkohë që listat do të hapen në atë formë siç me të drejtë tashmë e kërkon jo vetëm opozita parlamentare, por edhe opozita zyrtare joparlamentare, Partia Demokratike. Domethënë listat duhet të jenë të hapura 100% dhe në Parlament të shkojnë ata deputetë që i zgjedh populli me votë”, tha ai.
Konstitucionalisti shpjegoi edhe një herë se çfarë janë listat e hapura dhe ku ndryshojnë propozimet e palëve politike lidhur me këtë çështje.
“Me sqarimet që janë bërë ditët e fundit dhe me qëndrimet tashmë të konsoliduara, opozita parlamentare dhe ajo joparlamentare kërkojnë lista 100% të hapura. Në kuptimin që: Deputetët rreshtohen në një listë sipas qarkut dhe mbi bazën e votave që grumbullon partia ose subjekti politik, me numrin e mandateve ndahen sipas votave që ka marrë secili. Kjo është formula për publikun, pa hyrë në teknikalitete. Ndërkohë që, mazhoranca mbron listën që është e hapur teorikisht por që praktikisht funksionon me dy ekipe: ekipi A, i cili është nga mesi e sipër dhe ekipi B, që duhet të mundë ekipin A me votë dhe të marrë një ose dy vota më tepër se ç’është mesatarja e prodhimit të votës për secilin subjekt politik. Unë mendoj që asnjë parti politike nuk është i interesuar t’i shkatërrojë zgjedhjet, aq më shumë mazhoranca që është në pushtet. Është minimumi që të paktën listat të bëhen siç i kërkon opozita në Parlament dhe tashmë edhe opozita jashtë parlamentit”, shtoi ai.
