Pas sinjaleve të ardhura nga NATO-ja se Greqia e Turqia janë pajtuar për të nisur dialogun për uljen e tensionit në Mesdheun lindor, kryeministri grek, Kyriakos Mitsotakis është ende i shqetësuar. Në kohën kur u duk se palët kanë arritur dakordësinë, kryeministri grek ka kërkuar nga Turqia që të ndalë “kërcënimet”.
Deklarata e tij bëhet pas palajmërimeve nga NATO-ja, se të dyja vendet janë pajtuar për të nisur dialogun për uljen e tensionit në Mesdheun lindor.
“Kërcënimet duhet të shuhen, në mënyrë që kontaktet të fillojnë”, tha Mitsotakis.
Sekretari i Përgjithshëm i NATO-s, Jens Stoltenberg ka thënë se Turqia dhe Greqia kanë rënë dakord të zhvillojnë bisedime teknike, për krijimin e mekanizmave për parandalimin e konfliktit në Mesdheun Lindor.
Por Greqia mohoi më vonë se kishte rënë dakord të zhvillonte bisedime me Turqinë, të ndërmjetësuara nga NATO -ja, për të ulur tensionet mbi kufijtë detarë dhe të drejtat e kërkimit të gazit dhe naftës në rajon.
“Informacioni i botuar që pretendon se Greqia dhe Turqia kanë rënë dakord të mbajnë të ashtuquajturat ‘bisedime teknike’ mbi uljen e tensioneve në Mesdheun Lindor, nuk kanë të bëjnë me realitetin”, tha ministria e Jashtme e Greqisë.
