Pak çaste më parë, kryeministri Rama ka mbërritur në ambientet e Presidencës, ku do të diskutojë me Metën për të vendosur datën për zgjedhjet e ardhshme parlamentare. Rama shoqërohet në Presidencë nga Taulant Balla. Duke zbatuar masat anti COVID, kreu i qeverisë mbante një maskë të zezë në fytyrë, e po kështu ka munguar edhe përshëndetja e zakonshme, duke mos i dhënë dorën Metës.
Rama këtë herë ka zgjedhur të mbajë maskë, ndërsa Meta është mjaftuar me ruajtjen e distancës sociale.
Në hyrje të takimit, Meta i parashtroi kryeministrit arsyet e këtij takimi, ndërsa tha se vendosja e datës nuk ka ndonjë rëndësi të madhe.
“Unë fillova të zhvillonim konsultimet për datën e zgjedhjeve, me qëllim për të ndihmuar sa më shumë për një proces gjithëpërfshirës, jo se vendosja e datës ka ndonjë rëndësi vendimtare por për të respektuar çdo ndjeshmëri apo edhe kalendarë të tjera siç janë festat zyrtare. Në këtë drejtim, do të isha i interesuar të dëgjoja edhe mendimin tuaj si përfaqësues të PS dhe të mazhorancës”.
Meta ka nisur ditën e sotme takimet konsultuese me krerët e partive politike në vend, për të përcaktuar një datë për mbajtjen e zgjedhjeve parlamentare të 2021, brenda periudhës 15 prill deri më 15 maj.
Opozita kërkon 18 prillin për mbajtjen e zgjedhjeve, ndërsa socialistët kërkojnë 9 majin.
