Jozefina Topalli ka refuzuar që të plotësojë formularin e vetëdeklarimit në PD. Ky vendim vjen sipas saj, pasi partia nuk demokratizohet me formularë. Ajo bën përgjegjës për shkatërrimin dhe përçarjen e Partisë Demokratike, liderin aktual të selisë blu, Lulzim Basha.
E njohur si një prej zërave që i dolën kundër disa prej vendimeve të kryetarit të Partisë Demokratike, Lulzim Basha, Topalli kërkon nga ai që të largohet nga kryetari i partisë. Sipas saj, me një drejtim të ri, të gjithë do bashkoheshin realisht pa formularë dhe pa komisione.
“Partia nuk demokratizohet as me formularë, as me komisione. Lulzim Basha ka përçarë e shkatërruar PD-në.
Ai nuk beson në asnjë parim të partisë që lindi 3 dekada më parë. Në këto kushte, nëse vërtet do donte largimin e Edi Ramës, Lulzim Basha duhet të largohet nga kryetari i partisë.
Me një drejtim të ri, të gjithë do bashkoheshin realisht pa formularë dhe pa komisione, dhe Rama nuk do të kishte më shans për të drejtuar vendin”, ka thënë ajo për ‘Top Channel’.
Kritikja më e fortë e Lulzim Bashës, ishte ndër emrat më të propozuar nga baza demokrate në Shkodër, ndërkohë refuzimi sjell automatikisht përjashtimin e saj nga faza e dytë e procesit të përzgjedhjes së kandidatëve të mundshëm të PD-së.
Në udhëzimin e selisë blu, parashikohet se mosdorëzimi në kohë i formularit të deklarimit, nënkupton heqjen dorë nga mundësia për të qenë kandidat i mundshëm dhe Komisioni i Vlerësimit të Kandidatëve e heq personin e propozuar nga baza nga lista e kandidatëve, të cilët i nënshtrohen fazës së dytë.
