Pak orë pas mesnate, kanë marrë fund torturat e pritjes në pikën kufitare të Kakavijës. Lidhur me këtë situatë kaotike ka reaguar kryeministri Rama. Ai ka publikuar një foto ku tregon se ky ngërç, tashmë ka marrë fund.
Kreu i qeverisë, teksa shpreh një falenderim ndaj të gjithë qytetarëve që kontribuuan në zgjidhjen e kësaj çështje tejet madhore, u drejtohet me një kërkesë qytetarëve të tjerë të cilët do futen në Greqi. Ai u ka kërkuar që të ndjekin me vëmendje kriteret e përcaktuara në shtetin fqinj, për kalimin e kufirit.
Pas mesnate mori fund saga disa ditore e radhës kilometrike që ishte krijuar në doganën e Kakavijës. Pala greke punoi gjatë gjithë natës përtej orës 22:00, sikurse ishte rënë dakord, për të bërë të mundur kalimin e kufirit të të gjithë qytetarëve që prisnin në radhë. Marrëveshja u arrit falë komunikimit të autoriteteve shqiptare me palën greke.
Statusi
? FALEMINDERIT të gjithë atyre që kontribuan për zgjidhjen e ngërçit të rëndë në pikën kufitare të Kakavisë; qytetarëve në radhë të parë, që në shumicën dërrmuese patën mirëkuptim e durim megjithë hallin e madh; Emergjencave Civile, forcave të ushtrisë e të policisë, trupës së Urgjencës Shëndetësore dhe strukturave vendore, që u gjendën pranë njerëzve me përkushtim e pa orar; të gjithë atyre në vendin fqinj që u përfshinë pa rezervë në përpjekjen për ta lehtësuar situatën, në kushtet kur regjimi i ri kufitar e bënte punën për zgjidhjen e saj tejet të vështirë?????
U uroj nga zemra një qetësim sa më të shpejtë dhe rifillim normal të jetës së përditshme, të gjithë bashkëqytetarëve që e hoqën atë siklet të madh dhe u lutem të tjerëve në vijim, të ndjekin me vëmendje kriteret e përcaktuara në shtetin fqinj për kalimin e kufirit, e të mos nisen pa u siguruar se mund ta kalojnë kufirin pa siklete të ngjashme?
Rrugë të mbarë udhëtarëve të fundit dhe ruani veten e të tjerët nga virusi i rrezikshëm Covid19❤️
