Një avion që fluturonte nga Dubai në Calicut është përplasur ditën e djeshme, duke bërë që të paktën 17 persona të humbin jetën.
Sipas Daily Mail, në bordin e avionit ndodheshin 191 persona, ndërsa në mesin e viktimave janë edhe dy pilotët.
Pilotët u përpoqën ta ulin avionin në aeroport, por moti i keq bëri që përpjekja e tyre e parë të dështonte.
Kështu avioni ka fluturuar për rreth 20 minuta mbi aeroport, pas pasur mundësi për t’u ulur. Në përpjekjen e dytë për t’u ulur, avioni rrëshqiti nga pista dhe ra në një luginë rreth 9 metra të thellë.
Pamjet që qarkullojnë në rrjetet sociale tregojnë një avion të thyer në dy pjesë. Sipas njoftimeve të policisë, dy pilotët dhe 12 individë të tjerë u vranë në katastrofë, ndërsa 123 persona të tjerë u plagosën në përplasje.
“Unë mund të konfirmoj të paktën 14 vdekje në total. 15 pasagjerë të tjerë kanë lëndime kritike. Ende është një situatë në zhvillim”, tha për AFP polici i lartë vendor, Abdul Karim.
“Kemi të paktën 89 persona, shumë prej tyre me lëndime serioze, të pranuar në spitale të ndryshme të Kozhikode. Ambulancat po hyjnë akoma”, tha Sujith Das, një zyrtar tjetër i lartë i policisë.
