Kreu i Urgjencës Kombëtare, Skënder Brataj, njoftoi se strukturat shëndetësore po përgatiten për një valë tjetër, pasi në stinën e vjeshtës rikthehet edhe gripi stinor. Në një intervistë në Euronews Albania, Brataj tha se tashmë kemi dy armiq që duhet të mbrohemi.
“Po përgatitemi për një valë tjetër, do të thotë se është prania e virusit të gripit, sepse këtë valë e kemi.
Jo vetëm nuk ka ikur, por po shkon në rritje. Dihet që në vjeshtë vijon gjithmonë periudha e gripit, por duke gjetur dhe koronavirusin, normalisht kemi dy armiq që duhet të mbrohemi nga të dy”, theksoi ai.
Ai ftoi qytetarët të respektojnë masat e rekomanduara kundër pandemisë. Duke iu referuar edhe shifrave të të prekurve që janë në rritje, Brataj kërkoi zbatim të masave.
“Duhet të ngulim këmbë me zbatim të masave. Të zbatojmë këto që janë marrë në këto momente, por nuk po zbatohen rregullisht. Jemi në një momentin që shifrat janë rritur. Jemi në momentin që nuk duam që sistemi shëndetësor të shkojë në kolaps”, shtoi ai.
