Ka përfunduar mbrëmjen e djeshme procesi i votimit në Maqedoninë e Veriut, i cili zgjati plot tre ditë.
Sipas Komisionit Shtetëror të Zgjedhjeve, deri më tani janë numëruar mbi 96 për qind të votave në Maqedoninë e Veriut.
Mediat vendase bëjnë me dije se koalicioni “Mundemi” i udhëhequr nga LSDM-ja, me në krye Zoran Zaev kryeson me 36.13 për qind dhe VMRO-DPMNE me 34.65 për qind.
Partia BDI e Ali Ahmetit është me 11.57 për qind, ndërsa koalicioni ASH- Alternativa me 8.79 për qind. Ndërkohë Partia e Majta ka 3,96 për qind, PDSH 1.48 për qind dhe Integra 1.33 për qind.
Procesi i votimit në Maqedonisë e Veriut u nda në 3 faza. Në ditën e parë votuan personat e konfirmuar pozitiv me koronavirus dhe ata që ishin izoluar. Në ditën e dytë votuan të burgosurit dhe ata që vuanin nga sëmundje kronike, ndërsa ditën e tretë pjesa tjetër e mbetur.
