Deputeti i AAK-së në Kosovë, Rasim Selmanaj, ka bërë me dije se ka rezultuar pozitiv me koronavirus.
Përmes një postimi në Facebook, ai bën me dije se ka shfaqur simptoma të lehta që para 5 ditësh.
“Dje nga një kolege deputete pasi kishte pyetur për rezultatin tim, dikush nga laboratori i kishte thënë se jam negativ. Por si duket informata ka qen për testin e dy korrikut! Para pak qasteve më thirren nga Instituti dhe me njoftuan se kam rezultuar pozitiv! Tash e pesë ditë jam me simptome të lehta. Vazhdoj të ndjehem mirë”, shkruan ai.
Mirëpo në një prononcim për Express, deputeti ka pohuar se ka qenë i pranishëm në seancën e djeshme parlamentare. Deputeti shprehet i befasuar me rezultatet dhe i bindur se nuk e ka infektuar askënd tjetër.
“Po, dje kam qenë prezent në seancën e Kuvendit. Unë jam shumë i befasuar nga rezultatet sepse jam ruajtur shumë. Gjithmonë kam qëndruar me maskë dhe gjithmonë e kam mbajtur distancën. Prej meje s’ka shanca me marrë kërkush virusin”, tha ai.
