Duke filluar nga dita e nesërme, Greqia do të mbyllë kufijtë me Serbinë.
Lajmin e ka bërë të ditur ministri i Jashtëm serb, Ivica Daçiç. Në një prononcim për agjencinë serbe të lajmeve “Tanjug”, Daçiç deklaroi se nga nesër në orën gjashtë të mëngjesit Greqia do të mbyllë kufijtë e saj për qytetarët e Serbisë.
“Zyra e kryeministrit grek Kyriakos Mitsotakis ka njoftuar ambasadën serbe në Athinë se Greqia do të mbyllë kufijtë e saj për qytetarët serbë nga nesër, përveç rasteve të jashtëzakonshme ku do të ketë një leje të veçantë”, tha ai.
Me këtë rast, Daçiç iu ka bërë thirrje qytetarëve që kishin planifikuar të udhëtojnë në këtë vend, që t’i anulojnë udhëtimet e tyre.
Nga ana tjetër mediat greke raportojnë se, ministri serb i Tregtisë dhe Turizmit, Rasim Ljajiç, ka thënë për N1 se:
“Greqia po i mbyll kufijtë e saj për shkak të situatës epidemiologjike në Serbi dhe duke pasur parasysh që shumë turistë serbë ishin pozitivë pas testit të koronavirusit”.
