Prej fillimit të pandemisë, në vendin tonë janë prekur nga koronavirusi 110 fëmijë. 25% e këtyre rasteve janë aktive. Gjeorgjina Kuli, shefja e infektivit të pediatrisë ka thënë për “Ora News” se ka pasur pak raste të rënda, por asnjëherë nuk mund të flitet me siguri të plotë që fëmijët e kalojnë lehtë sëmundjen. Kjo pasi ka edhe fëmijë me sëmundje shoqëruese, sëmundje kronike. Nëse ekspozohen ndaj virusit, mund ta kalojnë më rëndë sëmundjen dhe mund të paraqesin komplikacione.
Ajo foli edhe për gjendjen e foshnjes 2 muajshe me COVID, që po merr trajtim spitalor bashkë me nënën. Shefja e infektivit të pediatrisë zbuloi ndër të tjera se aktualisht fëmija është mirë, dhe ruan parametrat e tij jetikë.
“Deri tani janë referuar pak raste të rënda te fëmijët. Asnjëherë nuk mund të flasim me siguri 100% që fëmijët e kalojnë lehtë. Ka edhe fëmijë me sëmundje shoqëruese, sëmundje kronike. Nëse ekspozohen ndaj virusit, mund ta kalojnë më rëndë sëmundjen dhe mund të paraqesin komplikacione.
Po kështu edhe moshat e vogla, ashtu si në rastin e foshnjës që kemi të hospitalizuar që erdhi me temperaturë të lartë dhe prekje të mushkërisë. Deri tani fëmija është mirë, ruan parametrat e tij jetikë, nuk ka temperaturë prej 24 orësh. Pi mirë, nuk ka shenja të vështirësisë në frymëmarrje. Uroj të mbetet deri në fund kështu”.
