Me tone të larta gjatë fjalës në Kuvend, deputeti Ralf Gjoni tha se çdo gjë që ndodh në Shqipëri është lojë politike, duke nisur nga emërimet në Gjykata dhe deri të Komisioni Hetimor për shkarkimin e Metës. Madje ai tha më tej se e pret me kërshëri shkarkimin e presidentit Meta.
“Çdo gjë që po ndodh sot është lojë, nga Gjykata, Komisioni Hetimor për shkarkimin e presidentit Ilir Meta. E pres me kërshëri shkarkimin e presidentit Meta. Jam dakord me ju z. Ruci se ky institucion duhet të ushtrojë presion mbi institucionet e pavarura”, u shpreh Gjoni.
Sipas tij, nuk mund të ketë drejtësi pa u ndryshuar sistemi zgjedhor. Madje, Gjoni shprehu haptazi pakënaqësitë që ka ndaj ambasadorëve amerikanë.
“Iku Lu-ja erdhi Kimi, do ikë Kimi do vijë Xhimi dhe prapë Qerimi, nuk do ketë drejtësi. Ku është Gjykata Kushtetuese, ku është Gjykata e Lartë? Ambasadorja e SHBA-së shkon te Kolegji i Apelit dhe bën thirrje për ndalimin e lojërave politike. Por kush po luan? PS, PD, LSI, të treja bashkë në krevat, Ilir Meta, Sali Berisha, Edi Rama, Taulant Balla në emër të socialistëve që nxit ndryshimet kushtetuese me deputetët që nuk kanë folur njëherë në jetën e tyre për listat e hapura”.
Ai u propozoi deputetëve të votojnë për ndryshimin e sistemit zgjedhor. “Unë shkoj në Komision se kam besuar se do ndryshonim sistemin. Po vijmë në fund të korrikut, dhe nuk po diskutohet për ndryshimin e sistemit. Pse PD kërkon papritur hapje listash? A keni këllqe (për listat e hapura)? Unë nuk bëhem pjesë e asnjë loje. Demokracia kërkon transparencë dhe procedurë, dhe ju kërkoj që t’i jepni drejtim propozimeve tona dhe të shohim ku qëndron çdo deputet, në cilin krah”, tha Gjoni.
