Kreu i Lidhjes Demokratike të Kosovës, Isa Mustafa, ka folur për anulimin e vizitës së delegacionit në Washington. Nëpërmjet një postimi në Facebook, ai thekson se delegacioni u nis drejt Washingtonit me vullnetin më të mirë, por u nda përgjysmë sa ishte në aeroplan.
Mustafa nënvizon se në situatën e krijuar, para se të takohen me Vuçiçin, duhet të sigurohen për funksionimin e të gjithë institucioneve.
Ai thekson ndër të tjera se bashkëpunimi me SHBA dhe BE nuk mund dhe nuk duhet të lidhet me proceset dhe procedurat e Dhomave të Veçanta të Gjykatës Speciale.
Pak më herët, kryeministri i Kosovës, Avdullah Hoti, konfirmoi se nuk do të marrë pjesë në takimin që ishte vendosur për t’u mbajtur me Serbinë në Uashington. Përmes një postimi në rrjetet sociale, kreu i qeverisë kosovare shprehej se ka njoftuar ambasadorin Grenell dhe se i duhet të kthehet në Kosovë për t’u marrë me situatën.
Statusi
Në LDK nuk ka konfuzion se a duhet të shkojë Kryeministri në Ëashington apo jo.
LDK beson fuqishëm në SHBA-të.
Për ne Ëashington u nis delegacioni shtetëror i Kosovës me vullnetin më të mirë, por u nda përgjysmë sa ishte në aeroplan. Në Ëashington shkohet me përkrahje të partive të koalicionit dhe të opozitës, sikurse edhe të të gjitha institucioneve shtetërore, jo vetëm me bindjen se kush duhet ti prijë delegacionit.
Është e mjerueshme të mendohet e të shkruhet se z. Hoti si Kryeministër e ka tani shansin të shkojë e ti prijë delegacionit, pasi tani nuk është Thaçi për shkak të Gjykatës Speciale.
Nuk kemi të bëjmë me Z. Thaçi dhe z. Hoti por kemi të bëjmë me shtetin e Kosovë.
Bashkëpunimi ynë me SHBA-të dhe BE nuk mund dhe nuk duhet të lidhet me proceset dhe procedurat e Dhomave të Veçanta të Gjykatës Speciale.
Në situatën e krijuar, para se të takohemi me Vuçiqin nevojitet të takohemi edhe një herë mes veti, të ulemi të gjithë bashk të bisedojmë, të gjejmë rrugë dhe zgjidhje të qëndrueshme. Të sigurojmë funksionimin e të gjitha institucioneve shtetërore, sepse pa funksionimin normal te tyre, është iluzore se mund të ecet me marrëveshje. IM
Një ditë më parë u publikua një akt-akuzë e Zyrës së Prokurorit të Specializuar me dhjetë pika për shqyrtim ndaj presidentit Thaçi, kryetarit të PDK-së, Kadri Veseli dhe të tjerë, të cilët akuzohen për një sërë krimesh kundër njerëzimit dhe krimesh lufte ndër të cilat, vrasje e paligjshme, zhdukje e detyruar e personave, përndjekje dhe tortura.
