Pas një beteje prej 92 ditësh me koronavirusin në spital, Steve White, 56 vjeç është rikthyer në shtëpinë e tij në Herefordshire, në Angli.
Sipas “The Mirror”, 56-vjeçari u shtrua në spital më datë 19 mars, katër ditë pasi kishte rezultuar me koronavirus.
Gjendja e tij u përkeqësua shpejt dhe mjekët i dhanë atij vetëm 1% shanse mbijetese. Mjekët i thanë familjarëve të pacientit, se shanset që 56-vjeçari ta mposhte koronavirusin ishin shumë të pakta.
Por dy fëmijët e tij iu lutën mjekëve që ta mbanin babanë e tyre edhe për disa ditë në respirator.
“Ata kurrë nuk më braktisën. Unë u kam borxh jetën time fëmijëve dhe mjekëve. I gjithë stafi i spitalit më quajti një hero, por ata janë heronjtë e vërtetë. Ishin ata që më mbajtën gjallë”, tha 56-vjeçari pasi doli nga spitali.
Britaniku ka qëndruar për 63 ditë në kujdesin intensiv. Ai tha për mediat vendase se nuk kujton shumë nga koha e tij në spital.
