Këshilli Bashkiak i Tiranës pritet të miratojë sot 3 mijë pagesat e para grante për Rindërtimin, si dhe 200 dosjet e para të shtëpive në zonat rurale.
Këshilli Bashkiak i Tiranës është mbledhur online mesditën e sotme, ndërsa kryetari Erion Veliaj zbuloi se janë në shqyrtim mbi 10 mijë dosje. Nga këto, 3 mijë do kalojnë nisur nga java tjetër, duke kompesuar me pagesë cash këtyre familjeve.
Po kështu ai tha se për 200 familjet që kërkojnë shtëpi të re, do kontraktohet firma e ndërtimit dhe do vijojë puna.
Veliaj transmetoi edhe një lajm aspak të mirë për dhjetra familje, ku kanë kujtimet e tyre në banesat ku jetojnë, pasi inxhinierët kanë marrë vendimin për ti shembur.
Kryetari i Bashkisë së Tiranës, Erion Veliaj njoftoi se do të shemben 41 pallate në Tiranë, pasi janë të rrezikshme për banorët. Pallatet që do shemben janë kryesisht në Kombinat dhe Kinostudio, ndërsa kryebashkiaku tha se nuk janë të sigurta më për jetesën e banorëve.
“Nëse dikush është zotërues i një vile të madhe, ky nuk është projekti social për të ndihmuar këta lloj, bëhet fjalë për ato familja me 1-2 kurora që duan një dhomë. Ne kemi shqyrtuar 10963 dosje, i kemi në proces verifikimi.
Së shpejti do kalojmë 3000 dosjet e para. Do fillojmë me pagesat ‘cash’ për 3000 familjet e para. Te ato familje që bëjmë pagesën ‘cash’, nuk kemi më detyrime ligjore, ata e vendosin vetë se çfarë bëjnë më paratë.
Për 200 familjet që kërkojnë shtëpi të re, do kontraktohet firma e ndërtimit dhe do vijojë puna.
Dua të bëj me dije dhe një lajm, është një lajm jo i mirë, bëhet fjalë për rreth 41 pallate që do të shemben, në zonën e Kombinatit, pak në Kinostudio. Unë e di që është gjithmonë e dhimbshme ndarja nga fqinjët, nga shtëpia, nga kujtimet, por këto vendime nuk i marr unë, por inxhinierët.
Ata e vendosin nëse pallati duhet të shembet apo duhet të rindërtohet. Ndërkohë është e rëndësishme që të kuptojmë diçka. Në më pak se 10 muaj, kemi mbaruar me gjithë shtatorin, kemi inaguruar shtëpitë e dëmtuara në muajin shtator nga tërmeti. Së shpejti do të kemi gati dhe kompesimet për ata që janë prekur nga tërmeti i nëntorit.
Ka nga ata që në kohë fatkeqësie fërkojnë duart, ka dhe nga ata që përveshin mëngët, si ju, bravo ju jam mirënjohës”, tha Veliaj.
