Vëllezërit Edmond dhe Robert Budina, janë konfirmuar së fundmi të prekur nga COVID-19. Në lidhje me këtë çështje, një reagim është përcjellë nga aktivistja e Teatrit Kombëtar, juristja Adriana Kalaja. Ajo qetësoi miqtë e kolegët e tyre se gjendja e dy vëllezërve Budina është e mirë.
Në një lidhje telefonike për ‘Report Tv’, juristja Kalaja u shpreh se ka kontaktuar me dy vëllezërit, të cilët sipas saj, akuzojnë kryeministrin Edi Rama se ka montuar rezultatin pozitiv të tamponit të COVID.
Teksa lëshon këtë deklaratë të fortë, ajo thotë se të dy vëllezërit nuk pranojnë që të jenë infektuar, ndërsa nuk kanë asnjë simptomë dhe gëzojnë shëndet të plotë. Po kështu, nuk rezulton që ata të kenë pasur kontakte me persona të infektuar. Siç duket, vëllezërit Budina nuk do e lënë me kaq, pasi do të ndërmerren hapat ligjorë, me qëllim zbardhjen e së vërtetës.
“Gjendja e tyre është shumë e mirë. E konfirmoj dhe mbaj përgjegjësi të plotë. Por na ana tjetër konfirmoj se të dy vëllezërit nuk pranojnë që të jenë infektuar dhe rezultati pozitiv i tamponit është montim me urdhër të Edi Ramës. Nuk kanë asnjë simptomë, gëzojnë shëndet të plotë dhe nuk rezultojnë të kenë pasur kontakte me persona me COVID.
Ne do të ndërmarrim hapat ligjore, me qëllim zbardhjen e së vërtetës dhe nëse testi është pozitiv në mënyrë të kundraligjshme kanë dalë emrat e dy personave, pasi Rama ka urdhëruar të bëjë pis emrin e dy vëllezërve dhe protestës. Vëllezërit Budina më kanë informuar se ky testim me urdhër të Ramës, dhe është montuar si lajm me urdhër të zotit Rama”, tha ajo.
Por a ndodhen dy vëllezërit në karantinë? “Në dijeninë time po. Pasi janë njerëz të përgjegjshem. Ne do të marrim hapat ligjor për të demaskuar këtë montim, dhe nëse është e vërtetë, pa miratimin e klientit nuk mund të dalin rezultatet e analizave”.
Dyshimet janë se dy vëllezërëve u është kërkuar që të bëjnë testimin, pasi kanë marrë pjesë në varrimin e hallës së tyre, por aktivistja shprehet se “Jo, është bërë shumë kohë më mbrapa. Është mbi 14 ditë dhe është insistuar me forcë nga ISHP, për t’u bërë dy vëllezërve që kanë asistuar në varrimin e hallës që ka qenë vetëm me familjarët, pak njerëz”.
Por a do ta bëjë Kalaja testimin, duke qenë se kanë qenë bashkë në disa ture në Shqipëri? “Nuk kam besim te rezultatet e këtij testimi, përsa kohë, qoftë ISHP nuk jep asnjë informacion të saktë, dhe rezultatet, por kjo gjë ndodh në të gjitha institucionet. Unë jam gati ta bëj testin, nuk do ta refuzoj. Por disa miq më thanë, duhet të fusësh miq për të bërë testin”, tha ajo.
