Një 45-vjeçare është vënë në kërkim nga policia, pasi besohet se ka marrë një unazë martese, që u denoncua e humbur nga një burrë.
Gruaja shfaqet në kamerat e sigurisë teksa ulet përtokë dhe merr diçka dhe sipas policisë mendohet se ka të bëjë me unazën që shtetasi me inicialet P.T ka denoncuar.
Shtetasi P.T ka rrëfyer në polici se ditën e humbjes së unazës së martesës, ai kishte shkuar për të bërë pazarin në tregun e fruta-perimeve që gjendet në rrugën “Vasil Shanto”.
“Aty në rrugë, një burri i ra të fikët dhe unë u mundova ta ndihmoj. Më pas, aty erdhi ambulanca dhe e mori, pas kësaj u afrova tek dyqani i fruta-perimeve dhe kërkova pak dezinfektues për të pastruar duart. Unë nuk e diktova që unaza më ra. Bleva qershi dhe u largova”, mësohet të ketë thënë kallëzuesi.
Pasi ka kuptuar se unaza e martesës i mungonte, kallëzuesi e ka kërkuar atë.
“Më thanë në dyqan që unazën e gjeti një grua përtokë, që kishte këmbëngulur që ishte e saja, pastaj hapëm kamerat dhe ashtu ishte. Një grua ulet dhe merr diçka”, rrëfen burri, i cili këmbëngul në kërkesën e tij për gjetjen e gruas që më pas do t’i kthejë unazën e rëndësishme, shkruan “abcnews.al”.
