Bojan Jovanovski dhe ish-prokurorja speciale, Katica Janeva janë shpallur fajtorë nga Gjykata në Maqedoninë e Veriut.
Ata akuzohen për rastin “Zhvatja”, rast i cili shënoi një skandal vitin e kaluar në vendin fqinj.
Sipas mediave vendase, Jovanovski u dënua me 9 vite burg ndërsa Janeva u dënua me 7 vite burg. Bojan Jovanoski u shpall fajtor për veprat penale “Marrje të shpërblimit për ndikim të jashtëligjshëm” dhe për “Pastrim parash”. Ndërsa Katica Janeva u dënua për veprat penale “Keqpërdorim i pozitës zyrtare dhe autorizimeve”.
Mësohet se Janeva nuk ishte e pranishme gjatë seancës ku u dha dënimi. Ajo i kishte dorëzuar gjykatës një shkresë, ku sqaronte se nuk mund të merrte pjesë për arsye familjare.
Jovanovski thuhet se ka ndikuar tek e akuzuara Janeva, që ajo të sjellë masa më të buta kundër një biznesmeni, i akuzuar në hetimin “Perandoria”, nisur nga ish-Prokuroria Speciale Publike.
Janeva dhe Jovanovski i njohur si “Boki 13”, para gjykatës i kanë mohuar akuzat dhe theksuan se nuk e kanë kryer veprën. Kujtojmë se gjykimi për rastin “Zhvatja” filloi në nëntor të vitit të kaluar.
