Kryeministri Edi Rama ka reaguar lidhur me artikullin e një gazete të njohur në Turqi.
Kjo e fundit ka shkruar një artikull, ku thuhej se pala turke kishte ndikuar në prishjen e marrëveshjes së 2009-ës mes Shqipërisë dhe Greqisë për çështjen detare.
Ashtu siç ka vepruar më parë edhe me mediat shqiptare, Rama e ka cilësuar si “kazan” këtë media duke mohuar vërtetësinë e këtij lajmi.
“Në mos gabohem, fjala kazan vjen nga turqishtja. Po, nga turqishtja! Kështu që kazani nuk është ekskluzivisht shqiptar. Kazani nuk ka vetëm në Shqipëri, por dhe në Turqi. Kazan ka dhe në Greqi. Në një kazan në Greqi flitej për një marrëveshje të fshehtë për t’i falur Turqisë Pashalimanin me synimin që të bënim një agresion natën ndërkohë që Greqia ishte gjumë. Kishte dhe një kazan në Angli që thoshte që në një restorant në Shqipëri hahej mish ariu. E patë? Arinjtë nuk janë për shitje, por i kemi në proces dialogu. Dakord?! Faleminderit”, tha ai.
Gjatë konferencës ku u prezantua kryenegociatori për anëtarësimin e vendit në BE, Rama foli edhe për një takim të mundshëm mes tij dhe presidentit Meta.
Rama shprehu gatishmërinë e tij që të takohet me Metën dhe të diskutojë për çështje të cilat kanë të bëjnë me integrimin e vendit në BE.
“Integrimi nuk është muhabet, nuk kam pasur ndonjë orë për muhabet me Metën, ka ura ndërveprimi si proces, dhe ne këtë drejtim kemi qenë së bashku në tryezën e mëparshme, dhe unë do jem kudo ku kërkohet prezenca ime, dhe mendoj qe dhe presidenti do jetë. Dhe mendoj se Meta kur do që do të flas me mua për integrimin do ulem mjafton mos te jetë për një datë zgjedhjesh mbi një kushtetutë imagjinare”, theksoi ai.
