Dy ditët e fundit ka patur një fluks të numrit të të infektuarve me COVID-19. Po cilat janë arsyet që ndodhemi në këtë gjendje? Mjekët fajësojnë qytetarët, të cilët shpesh harrojnë rregullat e ‘arta’, për të mos u infektuar me koronavirus. Dalja nga izolimi pritej të shoqërohej me një rritje të të infektuave, por mjeku i njohur epidemiolog, Ilir Alimehmeti fajëson edhe bluzat e bardha. I ftuar në ‘Wake Up’ në Top Channel, ai dha disa shpjegime për shtimin e rasteve me COVID-19 në vendin tonë.
Sipas Alimehmetit, numri i rasteve vjen edhe nga shtimi i numrit të testeve por dhe nga pakujdesia që mund të jetë treguar ne spitale.
“Në shifrat zyrtare të publikuara nga ministria, nga 42 të infektuar, 5 janë personel mjekësor. Duhet pasur kujdes tek spitali. Mjekët janë një potencial i madh infektimi. Pra mjeku e merr nga një pacient dhe mund t’ia transmetojë të tjerëve.
Duhet të ruajmë spitalin. Kjo është lufta jonë. Lombardia përjetoi atë krizë, sepse e humbi spitalin. Në vendet e zhvilluara, spitalet kanë 2 hyrje dhe disa janë dhe me dy dalje. Kanë 1 hyrje mjekët dhe një hyrje tjetër për pacientët dhe vizitorët. Ne kemi vetëm një hyrje”, përfundoi ai.
