Presidenti Ilir Meta ka bërë thirrje që të arrihet një konsensus për Reformën Zgjedhore përpara 8 qershorit. “Mesazhi i djeshëm i Bashkimit Evropian është i qartë, zbatimi i kushteve fillon me konsensusin për Reformën Zgjedhore. 8 qershori po afron! Komisioni Europian mezi po pret të shënojë një lajm pozitiv për Shqipërinë!”, shkruan kreu i shtetit në Facebook.
Ndërkombëtarët kanë intensifikuar lëvizjet për të zbutur palët, në mënyrë që të finalizohet me konsensus Reforma Zgjedhore. E diela ishte afati i fundit për të miratuar Reformën Zgjedhore, por kjo gjë nuk ndodhi, pasi nuk u arrit konsensusi. Ambasadorja e SHBA në Tiranë, Yuri Kim, ka vënë në rresht PD, PS, LSI, duke zhvilluar me ta 2 takime.
Por në mbyllje të takimit që ka zgjatur rreth 9 orë mes 4 anëtarëve të Këshillit Politik, treshja e ambasadorëve kanë dalë në një konferencë për mediat. Fillimisht ka qenë ambasadorja e SHBA, Yuri Kim, e cila u shpreh se orët e diskutimit kanë qenë të vështira, por me përparime, ndërsa iu bëri thirrje palëve politike që të lëshojnë pe, pasi sipas saj, Reforma Zgjedhore është tejet e rëndësishme për qytetarët shqiptarë dhe për integrimin e Shqipërisë në BE.
Sakaq, ambasadori britanik, Duncan Norman, iu bëri thirrje palëve për të gjetur konsensus. “Është thelbësore që këtë ta përfundojnë nesër, jo vetëm që Shqipëria të vazhdojë rrugën e saj drejt BE, por edhe votuesit shqiptar të kenë zgjedhje të lira herës tjetër. Le të përfundojmë punën”, deklaroi Norman.
