Paraditen e sotme, kryeministri Rama ka vizituar ambientet e ish-kirurgjisë në QSUT që tashmë janë shndërruar në një spital COVID-3. Për të, kjo është përgjigjja e duhur ndaj valës së dytë të COVID-19, edhe pse ai shpreson që të jetë një parashikim i gabuar. Kreu i qeverisë, duke qëndruar në të njëjtën linjë, shtoi se nëse nuk përgatitemi, atëherë numrat mund të shkojnë sa nuk i patëm herën e parë. Ndaj, ky spital është përgjigjja e duhur.
Krahë tij ishte edhe ministrja Manastirliu, ku e njoftoi se kapaciteti i këtij spitali është 100 shtretër.
“Sallë e mikrobiologjisë dhe kirurgjisë. Këtu është parasauna. Gjitha ambientet janë organizuar në mënyrë të tillë që të jenë të ndërlidhura. Ja dhe salla e terapisë intensive. Duhet pavarësisht se do shërbejë si konvaleshencë. 100 shtretër, 50 me oksigjen. Çdo kat është i njëjtë, me dhomat e reanimacionit, të personelit shëndetësor.
Kjo është një dhomë pacienti. Dhomë dyshe por ka dhe dhomë njëshe. Me tualet, edhe alarm”, tha Manastirliu.
Rama: Qenka super, super, super
Manastirliu: 100 shtretër nuk është pak. Kishim planifikuar për 400 shtretër, janë COVID-1, COVID-2, COVID-3 dhe COVID-4 dhe vala e dytë mund të jetë e dyfishtë prandaj duhet të përgatitemi.
Rama: Situata është më së miri, natyrisht falë ministres dhe juve. Strategjikisht vepruam drejt, insistuam ndjekjen me rigorozitet të planit. Nga ana tjetër përderisa nuk u përsëritën këtu shfaqjet e rënda dhe të forta si në vendet e tjera. Shpresoj që vala e dytë të jetë parashikim i gabuar një nga ato që është bërë në gjithë këtë periudhë. Shpresoj mos ketë por rreziku është i madh. Nëse nuk përgatitemi atëherë numrat mund të shkojnë sa nuk i patëm herën e parë. Dhe ky spital është përgjigjia e duhur. Unë shoh çfarë bëjnë të tjerët. Më thanë hapi Ramazon hapi, ndërsa tani kemi të hapur vetëm me Malin e Zi dhe Kosovën, kurse të tjerat jo. Kurse ka filluar sherri në BE me Francën e Spanjën, mos ja hapim ti hapim. Për turizmin me kë nuk kam biseduar. Nuk e di asnjë, nuk ka siguri, duhet bërë kështu apo ashtu. Hapja është e domosdoshme për ekonominë por është e rrezikshme. Ne duhet të jemi gati.
