Gazetari Artan Hoxha ka pasqyruar gjendjen e jashtëzakonshme në të cilën ndodhet qyteti i Minnesotas, pas shpërthimit të protestave të dhunshme. Shkak i këtyre protestave u bë vdekja e një shtetasi afrikano-amerikan. Personi ishte nën pranga dhe një polic i bardhë i kishte vënë gjurin në qafë, ndërsa ai thërriste se nuk po mbushej dot me frymë.
Në një status në Facebook ku dhe ka përcjellë detaje, gazetari Artan Hoxha tregon se gjatë protestave është arrestuar një gazetar i CNN, një producent dhe gjithashtu edhe një fotograf. Hoxha teksa ka publikuar edhe një video, shpjegon me detaje se çfarë ka ndodhur dhe reagimin që bëri televizioni CNN.
Gazetari po raportonte pranë një zone ku ishte departamenti i policisë së qytetit, që protestuesit e kishin djegur dhe oficerët e kishin braktisur gjatë natës. Një bllok më tutje po digjej një ndërtesë tjetër katër katëshe, që ishte restorant. Rrjeti televiziv postoi pamje të korrespondentit Omar Jimenez që fliste qetësisht me policinë. E ndërsa lidhur me këtë rast, Guvernatori i Minnesotas ndërkohë i kërkoi ndjesë rrjetit.
Statusi
Minneapolis, USA…
Policia e shtetit Minesota, arrestoi korrespodentin e CNN, Omar Jimenez, producentin dhe fotoreporterin e tij, ndërsa gazetari po raportonte pranë një zone ku ishte departamenti i policisë së qytetit, që protestuesit e kishin djegur dhe oficerët e kishin braktisur gjatë natës. Një bllok më tutje po digjej një ndërtesë tjetër katërkatëshe, që ishte restorant.
Gazetari e kishte badge-in e CNN-it, kur po raportonte, duke e identifikuar veten si reporter.
Ai i tha policisë se bashkë me ekipin e tij, do të shkonin kudo ku kishin nevojë për ta. Pastaj një oficer i kapi krahun ndërsa Jimenez fliste dhe i vuri prangat. Policia tha se ekipi i CNN është arrestuar sepse nuk është larguar nga vendi kur i bënë thirrje të largohej. Pasi u arrestua fotoreporteri i CNN, kamera e tij u vendos në tokë dhe vazhdoi të transmetojë live momentin e transmetimit.
CNN shkruan se, në zonë ishte dhe një gazetar i bardhë, por ai nuk u arrestua. Pas pak minutash në komisariat ata u lanë sërish të lirë, sipas konfirmimit të kolegëve të tyre në Tëitter.
Rrjeti televiziv postoi pamje të korrespondentit Omar Jimenez që fliste qetësisht me policinë, e cila ishte e armatosur me shkopinj gome dhe helmeta, dhe më pas shoqërohet me pranga në duar.
Guvernatori i Minesotës ndërkohë i kërkoi ndjesë rrjetit. CNN kishte lëshuar më herët një deklaratë në të cilën dënonte sjelljen e policisë duke thënë se arrestimi i reporterit dhe ekipit të tij, pavarësisht se ishin identifikuar, është një dhunim i hapur i amendamentit të parë të kushtetutës. Jimenez ndodhej në qytet ndërsa po mbulonte natën e tretë radhazi të zemërimit të shkaktuar nga vdekja e George Floyd, pasi ai ishte arrestuar me dyshimin se po përdorte kartëmonedha të falsifikuara.
Një video e marrë nga një kalimtar, tregonte oficerin e policisë që i vendoste gjurin në qafë atij ndërsa e kishte shtrirë më parë në tokë. Në një moment, Floyd dëgjohet të thotë se nuk mund të merrte dot frymë.
