Deputetja Rudina Hajdari, ka reaguar pas publikimit të videos nga Ardi Veliu. Hajdari shprehet se është e indinjuar nga sjellja e Ardi Veliut, dhe sipas saj, është munduar të justifikojë një krim të rëndë që ka ndodhur. Deputetja shkruan në një koment në Facebook se si grua, si nënë, nuk justifikon dhunimin në mënyrë kafshërore.
Tejet e revoltuar me këtë sjellje të Veliut, ajo e quan skandaloze marrjen e një videoje e trajtimin për qëllime personale.
Ajo vendos pikat mbi “i”, duke thënë se detyra e Policisë së Shtetit nuk është të përgjojë qytetarët e thjeshtë nga rrjetet sociale.
Ardi Veliu nxorri një video, me qëllim që të justifikonte dhunën shtazarake të 4 policëve ndaj një të mituri. Video ishte marrë nga rrjetet sociale të së ëmës së djalit, e cila është aktore.
Statusi
Si grua dhe si nënë jam shumë e indinjuar nga sjellja e sotme e Drejtorit të Përgjithshëm të Policisë i cili u mundua të justifikonte një krim të rëndë nga ana e policisë së shtetit, dhunimin e një minoreni pa asnjë shkak e në mënyrë kafshërore, duke denigruar figurën e nënës së tij. Detyra e Policisë së shtetit nuk është të përgjojë qytetarët e thjeshtë nga vrima e rrjeteve sociale, nuk është as denigrimi i taksapaguesve të rregullt, as nuk është bërja e biografive të personave që dhunojnë apo familjeve të tyre e aq më tepër nuk është ajo e denigrimit të grave dhe vajzave.
JO!
Detyra e policisë së shtetit është të godasë fort dhe pa mëshirë krimin e organizuar. Nëse Drejtori i Përgjithshëm do të kishte të njëjtin zell që ka për të denigruar nënat e viktimave të dhunës policore duke luftuar bandat dhe organizatat mafioze, Shqipëria do të ishte një vend më i sigurtë për të gjithë.
Kjo sjellje e tij e bën me turp gjithë strukturën e policisë dhe ky person nuk mund të vazhdojë të qëndrojë më në atë detyrë.
