Kryeministri në detyrë i Kosovës, Albin Kurti, është pyetur për Teatrin në një lidhje direkte në ‘Syri Television’. Ai tha se e kishte përjetuar keq shembjen e Teatrit. Në një periudhë pandemie në të cilën po jetojmë, Kurti u shpreh se ky aksion ishte i panevojshëm.
“Teatri Kombëtar për ne është skena kryesore dhe njëkohësisht historia e kulturës sonë. Aty janë dhënë aq shumë shfaqje dhe drama që janë të paharrueshme për kujtesën tonë. Për ne ishte shumë e rëndë. Duket që në shikim të parë, neo-liberalizmi është disi më shkatërraq se fashizmi kur vjen puna te publikja. Neoliberalizmi e sulmon shtetin më shumë se ideoligjitë e tjera diktatoriale, sepse është shteti kundër tregut. Shumë herët në mëngjes, në kohë të vështira të pandemisë, të papara për popullin tonë e nuk kishte nevojë për një aksion të tillë”, u shpreh Kurti.
I pyetur nëse duhej të komunikonte me Ramën fillimisht, ai tha se kur u informua ishte tejet vonë. Kurti shtoi më tej se duke parë që gjithçka ishte hedhur në erë, ishte e kotë një diskutim mes palëve.
“Kur mora vesh lajmin, ishte tepër vonë. Ishte një ndërmarrje pushteti që nuk donte diskutim. Nuk ke çfarë të diskutosh kur gjithçka është shembur. Prandaj freagova dhe nuk i kam shkruar asnjë zyrtari në Shqipëri. Jemi të ndjerë të prekur nga një veprim i tillë i natës”, tha Kurti.
