Shqipëria është përfshirë nga temperatura shumë të nxehta këto ditët e fundit, duke kapur edhe vlera 34oC.
Meteorologia Adiola Bami thotë se vendi ynë është përfshirë nga një valë të nxehti me origjinë nga Afrika e Veriut.
Kështu temperatura ka shkuar deri në 34 gradë celcius. Kjo është tipike e verës, por tani po ndodh që në pranverë.
“Kemi pasur qarkullim të masave ajrore nga veriu i Afrikës, nga jugu i kontinentit evropian. Kjo ka sjellë jo vetëm erë të fortë në territorin shqiptar, mbrëmë gjatë natës dhe sot gjatë mëngjesit, por edhe temperatura të larta në territor. Pasi sot jo vlerat e mëngjesit që kanë qenë 12-13oC në zonat malore, por edhe mesdita vijon të jetë e nxehtë në ultësirën perëndimore, ku parashikohen vlera deri në 34oC.
Me të njëjtat vlera termike dhe pak më të larta parashikohet edhe fundjava, pavarësisht se do të mbetemi me mot të vranët dhe jo me diell. Temperaturat do të vijojnë të jenë të larta, pasi parashikohet që vlerat e mesditës në zonat malore të shkojnë në 29 apo 30oC. Më e ndjeshme kjo rritje do të jetë në juglindje të vendit, por edhe ultësira perëndimore parashikohet të arrijë vlera 36oC”, tha ajo për Top Channel.
Sipas saj, kjo gjendje do të vazhdojë deri më 25 maj, pastaj temperaturat do të bien me 10 gradë dhe do të jenë tipike të pranverës.
