Nga: Veton Surroi
J. Borrell bën mirë të mendojë më mirë analogjinë e “më katolik se Papa” kur flet për marrëveshje trafikimi njerëzish e territoresh.
1.
Shefi i diplomacisë evropiane Josep Borrell përsëriti John Boltonin, ish- këshilltar për siguri kombëtare, dhe jo ndonjë dashamir i Evropës e Kosovës, kur u pyet se çfarë do të ishte pozicioni i BE-së ndaj një marrëveshjeje mes Kosovës e Serbisë, të ndërmjetësuar nga BE-ja, në të cilën do të përfshihej këmbimi i territoreve dhe i popullatës.
Pozicioni i Boltonit më 2018 ishte se SHBA-ja nuk mund të ishte kundër nëse presidentët e Serbisë dhe Kosovës pajtoheshin për këtë gjë. Pozicioni i Borrellit ishte se BE-ja nuk mund të bëhej më katolike se Papa. Pra, nëse Thaçi dhe Vuçiqi besonin se kjo do të ishte mënyra më e mirë për t’i zgjidhur problemet mes Kosovës dhe Serbisë, BE-ja nuk mund të vendosej si pengesë e besimit të tyre të ndërsjellë.
Me këtë diplomati evropian, si dhe ai amerikan para tij mbërritën të përshkruanin cektësinë intelektuale dhe të energjisë politike të angazhimit të tyre. Nëse presidentët e Kosovës dhe Serbisë mendojnë se problemi mes tyre zgjidhet me zvogëlimin e popullatës serbe në Kosovë dhe të asaj shqiptare në Serbi, dhe nëse SHBA-ja dhe BE-ja do ta pranonin këtë, atëherë i bie që nuk kanë ndërmend të investojnë ndonjë mund më të madh tutje. BE-ja nuk ka nevojë t’u dërgojë presidentëve të Kosovës dhe Serbisë ndërmjetës si Lajçaku, mjafton një kartograf. /Koha Ditore
