Ministrja për Marrëdhëniet e Parlamentit, Elisa Spiropali nga foltorja e Kuvendit iu përgjigj akuzave të PD-së dhe LSI-së për tenderat në kohën e pandemisë.
Ajo deklaroi se kryetari i PD-së Lulzim Basha ka kopjuar stilin e zotit Myslim Murrizi në të folur.
“Qeveria nuk është marrë vetëm me qese edhe pse është ndërmarrje e bashkuar e bashkive dhe Shtabit të Emergjencave.
Kryetarët e bashkive i kanë të gjitha listat e njerëzve me ndihmë ekonomike dhe pensionistëve.
Qeveria ka nxjerrë 45 urdhra, që bizneset e vogla edhe pse nuk janë mbyllur me ligj të mos paguajnë qira në prill-maj.
Basha ka kopjuar stilin e zotit Murrizi në të folur, po Murrizit i shkon se nuk është përlyer në tendera. Zoti Basha kur ka shkuar në gjyq për tenderat, e dini ju, është shmangur me raport shëndetësor.
Flasin për habira që vetëm ata i sajojnë, për të mos folur për atë partinë tjetër që nxjerr aty një mjek politikan që i bën të gjitha çorbë se në kohën e tyre deti ishte kos, i shtonin dhe pilaf, merrnin ndonjë lugë të tërë.
Kontratat tona nuk janë sekrete, janë publike, janë aty për t’i parë të gjithë”, u shpreh Spiropali.
