Sistemi i drejtësisë është në kolaps, për shkak të situatës kaotike që po përjetojmë me pandeminë. Emergjenca e COVID-19 ka dhënë ‘provat’ se ka futur në kaos edhe drejtësinë. Ish-kryeprokurori Adriatik Llalla, ish-ministri Saimir Tahiri, ish-kryeministri Sali Berisha dhe kreu i PD, Lulzim Basha janë në procese gjyqësore.
Për të katërt këta personazhe nuk po zhvillohen seancat paraprake, për shkak të vendimit të shtyrjes së gjyqeve. Ish-kryeprokurori akuzohet për ‘fshehje’ dhe ‘mosdeklarim të pasurisë’. Ish-ministri Saimir Tahiri u dënua në Shkallën e Parë me 3.5 vite shërbim prove për ‘shpërdorim detyre’, ndërkohë që ra akuza e ‘grupit të strukturuar kriminal’. Prokuroria nuk u pajtua me këtë vendim dhe e dërgoi çështjen në Apel, i cili do të vulosë fatin e ish-ministrit. Edhe gjyqi i tij është shtyrë për shkak të situatës.
Në gjykatë janë dhe dy liderët e PD, ish-kryeministri Sali Berisha dhe kreu demokrat Lulzim Basha. Ndaj Bashës nisi një hetim për lobimet në SHBA, ku fillimisht akuzohej për ‘pastrim parash’ dhe ‘mosdeklarim të ardhurash’. Por këto akuza ranë dhe mbeti vetëm ‘falsifikimi i formularëve’. Edhe për të gjyqi u shty për shkak të COVID-19.
Në Gjykatën e Apelit ka shkuar çështja e aferës së CEZ. Kuvendi paditi Sali Berishën, Ritvan Boden, Genc Rulin, Florion Mimën dhe disa funksionarë të tjerë për abuzime me privatizimin e OSSH. Dosja u pushua nga prokuroria dhe tashmë pritet vendimi i Apelit. Ndërkohë kemi dhe dy dosje nën hetim. Izet Haxhia ka bërë një padi ndaj ish-kryeministrit Berisha për 23 vepra penale. Hetimet për këtë dosje kanë ngecur, për shkak të koronavirusit. Një tjetër dosje është një padi që juristi Romeo Kara bëri për pushimin e hetimeve për aferën e CEZ. Ai paditi gjyqtarin Lazër Sallaku, ish-kryeministrin Berisha e disa të tjerë. Edhe kjo dosje ka ngecur.
