Kryeministri Edi Rama ka folur në lidhje me rrezikun që mund të sjellë hapja e shkollave dhe universiteteve.
Në komunikimin e tij live në Facebook, Rama tha se në lidhje me to do të merret një vendim në fillim të javës tjetër. Kreu i qeverisë tha se pas tërmetit të 26 nëntorit, shkollat janë mbipopulluar shumë, për shkak të dëmeve të shkaktuara.
“Deri në fillim të javës tjetër, do kemi një vendim për shkollat dhe universitetet. Nuk është e lehtë. Harrojeni Suedinë. Vetëm Danimarka i ka hapur shkollat pjesërisht. Me të gjithë kryeministrat që kam folur thonë se nuk e dinë se ca do bëjmë. Ne kemi dhe një taksirat tjetër, pasojat e tërmetit. Ku kemi humbur shumë shkolla në zonën më të populluar të Shqipërisë, dhe kjo na ka mbipopulluar shkollat. Ndaj risku nëse hapim shkollat dhe ai është i madh”, tha ai.
Shkollat dhe universitetet janë mbyllur që prej datës 11 mars, në kuadër të masave kufizuese për frenimin e përhapjes së mëtejshme të pandemisë së koronavirusit.
