Ministri i Brendshëm, Sandër Lleshaj, në fjalën e marrë në Kuvend, tha se pjesa dërrmuese e shqiptarëve i kanë mbështetur masat kufizuese për parandalimin e përhapjes së koronavirusit. Ai paralajmëroi të gjithë ata që devijojnë e që shkelin ligjin, se do të përballen me burgun. Duke bërë një përmbledhje të zhvillimeve mbi COVID-19, Lleshaj tha se devijimet duhet të shoqërohen me sanksione, dhe ky është thelbi i ndryshimeve në Kodin Penal. Ministri sqaroi më tej se të gjithë abuzuesit duhet të paguajnë një çmim penal. Ndryshimet fillojnë nga gjoba administrative, tek dënimi me 1 vit burg.
“Pjesa dërrmuese e shqiptarëve, i janë përgjigjur në mënyrë shembullore masave. Por devijimet duhet të shoqërohen me sanksione, dhe ky është thelbi i ndryshimeve në Kodin Penal.
Duhet të penalizohen, duhet të ketë një sanksion që i detyron të binden. Gjithë kjo dramë globale ka filluar nga një rast i vetëm para 4 muajsh, që sot ka sjellë mbi 2 milionë njerëz të prekur në botë.
Nuk mund t’ia lejojmë të luajmë me zjarrin, ndërkohë që jemi në fazë inkurajuese për ta mbyllur këtë histori.
Ata që janë të papërgjegjshëm, duhet të paguajnë një çmim penal. Ndryshimet fillojnë nga gjoba administrative, ngjiten tek dënimi me 1 vit burg, pastaj përshkallëzohen për arsye se ai që shkakton vdekje, pavarësisht mjetit që e shkakton, duhet të paguajë për të. Nëse dikush vret me armë, edhe nëse dikush vret me virus, duhet të paguajë për këtë”, deklaroi ministri.
