Presidenti amerikan Donald Trump ka udhëzuar administratën e tij që të ndalojë fondet për Organizatën Botërore të Shëndetësisë. Ky vendim vjen, pasi sipas tij, OBSH ka dështuar në detyrën e saj themelore në menaxhimin e pandemisë së koronavirusit.
Të menjëhershme kanë qënë reagimet, pas vendimit të presidentit të SHBA-së, Donald Trump, për të ndaluar financimin e OBSH-së.
Bashkëthemeluesi i Microsoft, Bill Gates dhe gruaja e tij Melinda, kanë thënë se vendimi i presidentit amerikan Donald Trump për të ndaluar fondet për OBSH, është “aq i rrezikshëm sa tingëllon”.
“Bota ka nevojë për OBSH tani më shumë se kurrë”, shkruajtën ata me nje postim në Twitter. Organizata e tyre, Fondacioni Gates, është një nga donatorët më të mëdhenj të OBSH-së.
Edhe Shefi i Kombeve të Bashkuara ka kritikuar Donald Trump për vendimin e marrë.
“Tani është koha për unitet, dhe bashkësia ndërkombëtare të punojë së bashku në solidaritet, për të ndaluar këtë virus dhe pasojat e tij shkatërruese”, tha Sekretari i Përgjithshëm i OKB, António Guterres.
Guterres megjithatë theksoi se OBSH ishte “në vijat e para, duke mbështetur shtetet anëtare dhe shoqëritë e tyre, veçanërisht më të prekurit midis tyre, me udhëzime, trajnime, pajisje dhe shërbime konkrete për shpëtimin e jetës”.
“Unë kam besim se Organizata Botërore e Shëndetit duhet të mbështetet, pasi është absolutisht kritike për përpjekjet e botës për të fituar luftën kundër Covid-19″.
