Zëdhënësi i Ministrisë së Jashtme, Abbas Mousavi është shprehur se Irani kurrë nuk do t’i kërkojë SHBA-ve për të ndihmuar Teheranin në luftën kundër koronavirusit.
Gjatë një konference televizive, ai tha se më parë Washington duhet të heqë sanksionet e tij “të paligjshme” ndaj Republikës Islamike.
“Irani kurrë nuk ka kërkuar dhe nuk do t’i kërkojë Amerikës të ndihmojë Teheranin në luftën e tij kundër shpërthimit… Por Amerika duhet të heqë të gjitha sanksionet e paligjshme të njëanshme ndaj Iranit. Ata (SHBA) po përpiqen ta detyrojnë Teheranin të pranojë negociatat me Amerikën”, tha ai.
Irani është një nga shtetet më të prekura nga koronavirusi në botë, teksa numëron më shumë se 58 mijë raste infektimi.
Deri më tani në Iran janë shënuar 3,603 viktima nga COVID-19, ndërsa mbi 22 mijë persona janë shëruar.
