Kryeministri Edi Rama ka dalë në një tjetër komunikim live në Facebook me qytetarët.
Gjatë fjalës së tij, Rama bëri me dije se nëse shifrat deri ditën e diel do të jenë optimiste, atëherë nga java e ardhshme do të nisë lehtësimi i masave për lëvizjen.
Rama sqaroi se kjo nuk do të thotë që lufta po mbaron, teksa i bëri thirrje qytetarëve që të mos e lëshojnë veten.
Kreu i qeverisë theksoi edhe një herë se masat shtrënguese janë të nevojshme, pasi falë tyre kemi një numër më të vogël të prekurish, nga çfarë mund të kishte pasur.
“Masat shtrënguese na kanë ndihmuar jashtëzakonisht në uljen e agresivitetit të armikut që na ka dëmtuar më pak se sa parashikimet tona.
Krahasojeni me katastrofën që mund të gjendeshim nëse s’do kishim marrë masat, jo vetëm do ishim duke numëruar mbi 100 të vdekur tani që flasim por do përjetonim tmerrin e mijëra të vdekurve deri në fund të luftës.
Kjo nuk do të thotë që katastrofa është shmangur përfundimisht e mos o zot të lëshoni veten tani kur lufta nuk ka shkuar ende në gjysmë, e di që s’është e lehtë të vazhdojmë kështu por nuk kemi asnjë rrugë tjetër.
S’dua të entuziasmoj askënd para kohe por dua t’ju informoj se po detajojmë për lehtësim gradual të masave që do hyjnë në zbatim menjëherë sapo të shohim fillimin e rënies së kurbës.
Nuk e dimë se kur, por dimë që deri në mes të prillit do mësojmë shumë mbi sa thellë është shtrirë ky armik i padukshëm mes nesh.
Po studiojmë disa lehtësime të lëvizjes që i kemi gati me ndihmën e zotit duke filluar me pikatore nga java e ardhshme, po qe se, numrat deri të dielën, do na lejojnë ta marrim në konsideratë pikatoren”, tha ai.
